Meta – Ramës: Protestues mos bëni zhurmë, KQZ po punon tē përputhë votat

Presidenti Ilir Meta i është përgjigjur “flakë për flakë” Ramës, i cili në fjalimin e tij në parlament u tregua i ashpër ndaj Presidentit, duke e cilësuar si një armik të kushtetutës.

Meta nuk e ka përmendur fare Ramën, por i është kundërpërgjigjur duke iu drejtuar me një mesazh qytetarëve që këtë të hënë kanë dalë në protestën e thirrur nga opozita. Presidenti Meta shkruan përmes një statusi në rrjetin social se i përshëndet mbi 85% të shqiptarëve që refuzuan të shkojnë më 30 qershor në votime, një ditë që Meta e ka cilësuar si një ndër ngjarjet më të shëmtuara.

Më tutje Meta ironizon duke u sugjeruar protestuesve që të mos bëjnë shumë zhurmë, pasi Komisioni Qendror i Zgjedhjeve ende po merret me rezultatin e 30 qershorit, në mënyrë që të përputhë shifrat e pjesëmarrjes dhe votimit me “tejkalimet e shfrenuara” të socialistëve.

Të dashur qytetarë!

Ndërsa drejtuesit e Opozitës së Bashkuar ju kanë ftuar sot në një protestë kombëtare kundër votimeve socialiste të 30 qershorit, dua të përshëndes mbi 85% të qytetarëve, të cilët bojkotuan një proces “fake”, më të shëmtuarin që mund të ndodhte në kontinentin tonë të civilizuar, pas 3 dekadash që kur vendi ynë u nda nga regjimi më shtypës i të drejtave të njeriut që njohu e gjithë Europa ish-komuniste.

Ndaj një mirënjohje të gjithë shqiptarëve, të cilët bojkotuan farsën më të turpshme që mund të bënte vendi në këto momente kur klasa politike duhet të tregonte përgjegjësi dhe vizion europian.

Për këtë ka meritë dhe distancimi i prerë dhe i qartë i lidershipit tuaj, nga çdo akt dhune në dy javët e fundit që ndihmoi shumicën dërmuese të shoqërisë tonë për të identifikuar armikun e betuar të dialogut në këto 6 vite në vendin tonë, i cili ka mbijetuar vetëm përmes diversionit, përçarjes së opozitës, blerjes së zgjedhjeve përmes aktivizimit të “çunave problematikë” dhe lobingjeve të shfrenuara për t’i mbyllur sytë gjithë botës për të mos parë një maskaradë të gjithanshme, që kulmoi me të Dielën e Fitorjeve, plot tejkalime të shfrenuara.

Ndaj ju ftoj të vazhdoni të protestoni vetëm paqësisht, për ta bërë kauzën tuaj edhe kauzën e shumicës së atyre që u detyruan të merrnin pjesë në farsën e 30 qershorit.

Nga ky test shumë i rëndë ku u provokua demokracia jonë dhe bashkëjetesa qytetare, kjo kauzë i ka të gjitha mundësitë për të dalë shumë më e fortë vetëm përmes rezistencës qytetare dhe paqësore.

Ju lutem dhe për sa më pak zhurmë sot, në respekt të organizatës socialiste në KQZ, që po punon ditë e natë të përputhë rezultatet, me tejkalimet e shfrenuara që vazhdojnë çdo moment.

Be the first to comment

Lini një Përgjigje